Paano poprotektahan ang sarili laban sa online sextortion: mas matalino at mas ligtas kung sama-sama

Kaalaman tungkol sa panloloko By Western Union Fraud Prevention Team February 3, 2026

Ang internet ay isang kahanga-hangang tool na nakakatulong sa atin para manatiling konektado, pero para manatiling ligtas online, alam dapat natin ang mga panganib. Ang isang matinding banta ay ang sextortion, isang anyo ng online blackmail na posibleng magkaroon ng malaking epekto sa sinuman. Buti na lang, puwede nating matutunan kung paano ito tutukuyin at pipigilan, at sa pamamagitan ng pag-aksyon, makakatulong ka sa pagprotekta sa lahat online. Sa mga nakalipas na taon, matindi ang itinaas ng bilang ng sextortion na may pinansyal na dahilan, kung saan napag-alaman sa isang pandaigdigang pag-aaral noong 2024 na 1 sa 7 adult ang nakaranas nang pagbantaan na ishe-share ang kanilang maseselang image. Kung sama-sama tayo, kaya nating makagawa ng pagbabago!

Ano ang sextortion?

Ang sextortion ay isang krimen kung saan nagbabanta ang mga scammer na magshe-share sila ng mga pribadong sekswal na image, video, o personal na impormasyon maliban kung ibibigay mo ang mga hinihingi nila. Kadalasan, kabilang sa mga hinihinging ito ang pagbibigay ng pera, pagbili ng mga gift card, o pagsasagawa ng iba pang aksyon na ayaw mong gawin.

Narito ang dapat tandaan: Kahit sino ay puwedeng maging target, kahit hindi ka pa kailanman nakapag-share ng maselang larawan. Lubos na mahuhusay ang mga kriminal at kaya nilang gumamit ng mga sophisticated na tool gaya ng Artificial Intelligence (AI) para gumawa ng mga kapani-paniwalang pekeng image o video.

Paano maging #Befraudsmart at tukuyin ang mga babalang senyales

Gumagalaw ang mga kriminal kahit saan: sa mga dating app, social media, webcam, gaming platform, at messaging service. Kadalasan, gumagamit sila ng mga pekeng pagkakakilanlan, o nangka-“catfish” sila, para mabilis silang mapagkatiwalaan.

Maging matalino at bantayan ang mga red flag na ito:

  • Mga nagmamadali: Talagang nagmamadali silang pumasok sa seryoso o sekswal na relasyon, minsan sa pamamagitan ng pagpapadala ng maselang image kahit nagsisimula pa lang kayong mag-usap para masanay ka na sa ganito, at puwede silang manghingi ng maseselang image o sekswal na video bilang kapalit.
  • Mga nagpupumilit: Paulit-ulit ka nilang pinipilit na gumawa ng mga bagay – lalo na ang mga sekswal na bagay kahit malinaw mong sinabi na hindi ka kumportableng gawin ang mga iyon.
  • Malawak ang network: Nagpapadala sila ng friend request sa maraming taong hindi nila kilala para malaman kung sino ang kakagat, kadalasan sa pamamagitan ng pakikipag-ugnayan sa mga taong hindi pa nila kailanman nakilala.
  • Mga mapagbanta: Sinasabi nila na na-hack nila ang account mo, na-access ang mga contact mo, o nakakuha sila ng mga image mo, at pagkatapos ay agad silang manghihingi ng pera.

Tandaan: #BeFraudSmart kung may bago kang kakilala online na nagmamadaling makipag-usap sa iyo sa sekswal na paraan o manghihingi sa iyo ng maseselang image, isa itong malaking babalang senyales at posibleng pagtatangka ito sa sextortion.

Maagap na pag-iwas: pagkontrol sa iyong kaligtasan

Mahusay na opensa ang matibay na depensa! Sundin ang mga hakbang na ito para lubos na mapababa ang panganib sa iyo:

  • I-maximize ang iyong privacy: Tingnan ang mga setting ng privacy at seguridad ng lahat ng iyong social media, messaging, at gaming app. Limitahan kung sino ang nakakakita sa iyong mga post at magpadala lang ng mga message sa mga taong pinagkakatiwalaan mo.
  • Huwag mag-share ng personal na impormasyon: Iwasang mag-share ng mga detalyeng lubos na personal (gaya ng iyong eksaktong home address, pinagtatrabahuhang lugar, o sensitibong pinansyal na impormasyon) sa mga estranghero online. Puwede itong gamitin ng mga kriminal para gawing mas kapani-paniwala ang kanilang mga banta.
  • I-verify ang mga profile: Mag-ingat sa mga profile na kaunti lang ang mga larawan, gumagamit ng mga model shot na propesyonal ang dating, o walang mutual friends. Maglaan ng panahon para i-reverse image search ang kanilang mga larawan para malaman kung peke ang mga ito.
  • Huwag kailanman magbukas ng mga attachment mula sa mga estranghero: Puwedeng gumamit ng mga mapanirang attachment para mag-install ng malware na nagbibigay ng access sa mga kriminal sa iyong device.
  • Makipag-usap sa iba: Kung hindi ka sigurado tungkol sa isang online na interaksyon, sabihin ito sa isang mapagkakatiwalaang kaibigan o sa kapamilya. Kadalasan, mabilis makatukoy ng scam ang paghingi ng second opinion.

Narito ang dapat gawin kung target ka

Maging kalmado, may mahihingian ka ng tulong! Kung sa tingin mo ay target ka, narito ang mga agaran at mabibisang hakbang na puwede mong gawin:

  • Ihinto ang lahat ng komunikasyon: I-block agad ang tao sa lahat ng platform. Gamitin ang mga built-in tool sa pag-report at pag-block sa lahat ng app mo. Ang pagputol sa contact ang unang hakbang para sa pagkakaroon ulit ng kontrol.
  • I-save ang ebidensya: Huwag i-delete ang mga natanggap mong message. Kumuha ng mga screenshot ng lahat ng message at profile. Mahalagang ebidensya ito para sa tagapagpatupad ng batas at sa mga tool sa pag-aalis.
  • Huwag magbayad o huwag ibigay ang mga hinihingi: Hindi solusyon sa problema ang pagbabayad. Malamang sa malamang, hihingi lang ng dagdag na pera ang mga kriminal at puwede pa rin nilang i-share ang mga image. Sa pamamagitan ng pagtanggi sa pagbabayad, pinuputol mo ang cycle.
  • I-report ang insidente: Makipag-ugnayan sa tagapagpatupad ng batas sa lugar mo. Ibahagi ang ebidensyang na-save mo. Kung hindi mo sinasadyang makapagpadala ng pera, abisuhan agad ang iyong pinansyal na institusyon.
  • Tandaan mo na hindi mo ito kasalanan: Ang taong sinusubukan kang kikilan ay nagsasagawa ng isang matinding krimen. Sa pamamagitan ng paghingi ng tulong, hindi mo lang basta pinoprotektahan ang sarili mo, nakakapagbigay ka rin ng mahahalagang impormasyong makakatulong sa mga awtoridad na pigilan ang mga kriminal at sa ibang tao na maiwasang mabiktima.

Saan makakahingi ng tulong

Nag-o-offer ang mga organisasyong ito ng kumpidensyal na payo, gabay, at mga tool para tulungan kang harapin ang sextortion. Hindi mo kailangang harapin ito nang mag-isa. Kung nakakaranas ka ng sextortion o kung gusto mo lang ng mapagkakatiwalaang gabay, makakatulong ang mga organisasyon sa ibaba para magkaroon ka ng kontrol, makahingi ka ng suporta, at maprotektahan mo ang iyong sarili nang may kumpyansa:

Ang National Center for Missing and Exploited Children (NCMEC)

Ang Internet Watch Foundation – Gabay sa sextortion at mga tool sa pag-aalis ng image.

Stop Non-Consensual Intimate Image Abuse

Ang Federal Bureau of Investigation (FBI) – Mga resource tungkol sa sextortion na may pinansyal na dahilan.

eSafteyCommissioner Australia – Gabay sa pagharap sa sextortion.

United Kingdom Police